1ܘܟܲܕ ܐܲܢܹܐ ܗܹܘܡܸܙܡܵܢܹ̈ܐ ܗܲܡܙܘܼܡܹܐ ܗَܘܵܘ ܠܛܵܝܸܦܵܐ؛ ܩܸܡܠܗَܘܿܢ ܥܲܠܵܝܗܝ ܟܵܗܢܹ̈ܐ ܘܙܲܕܘܼܩܵܝܹ̈ܐ؛ ܘܪܹ̈ܫܵܢܹܐ ܕܗܲܝܟܠܵܐ. 2ܟܲܕ ܟܲܪܒܝܼ ܗَܘܵܘ ܡܸܢܵܝܗܝ ܕܡܵܠܘܿܦܹܐ ܗَܘܵܘ ܠܛܵܝܸܦܵܐ؛ ܘܡܲܟܪܘܿܙܹܐ ܒܡܫܝܼܚܵܐ ܒܘܼܬܿ ܩܝܵܡܬܵܐ ܡ̣ܢ ܒܹܝܬܼ ܡܝܼܬܹ̈ܐ. 3ܕܒܼܝܼܩܠܗܘܿܢ ܐܸܠܵܝܗܝ؛ ܘܢܛܝܼܪܵܝܠܗَܘܿܢ ܠܝܵܘܡܵܐ ܐَܚܹܪَܢܵܐ؛ ܣܵܒܵܒ ܩܘܼܪܒܸܢܵܐ ܗَܘܵܐ ܪܲܡܫܵܐ. 4ܘܪܵܒܵܐ ܕܫܡܸܥܠܗَܘܿܢ ܗܹܡܸܙܡܵܢ ܗܘܼܡܸܢܘܿܢ؛ ܘܒܡܸܢܝܵܢܵܐ ܐܲܝܟܼ ܚܲܡܫܵܐ ܐܲܠܦܹ̈ܐ ܓܲܒܼܪܹ̈ܐ ܗَܘܵܘ. 5ܒܝܵܘܡܵܐ ܐَܚܹܪَܢܵܐ؛ ܓ̰ܡܝܼܥܠܗَܘܿܢ ܓܘܼܪ̈ܵܢܹܐ ܘܚܘܵܪ̈ܕܸܩܢܹܐ ܘܣܵܦܪܹ̈ܐ. 6ܘܐܘܼܦ ܚܲܢܵܢ ܓܘܼܪܵܐ ܕܟܵܗܢܹ̈ܐ؛ ܘܩܲܝܵܦܵܐ؛ ܘܝܘܿܚܲܢܵܢ؛ ܘܐܵܠܹܟ̣ܣܲܢܕܪܘܿܣ؛ ܐܵܢܝܼ ܕܝܼܗَܘܵܘ ܡ̣ܢ ܐܘܼܓ̰ܵܓ̣ ܕܓܘܼܪܵܐ ܕܟܵܗܢܹ̈ܐ. 7ܘܟܲܕ ܡܘܼܩܸܡܵܝܠܗَܘܿܢ ܒܒܹܝܦܲܠܓܵܐ؛ ܒܘܼܩܸܪܘܿܢ ܡܸܢܵܝܗܝ؛ ܒܐܲܝܢܝܼ ܚܲܝܠܵܐ؛ ܝܲܢ ܒܐܲܝܢܝܼ ܫܸܡܵܐ؛ ܥܒܸܕܠܵܘܟ̣ܘܿܢ ܐܵܗܵܐ. 8ܗ̇ܝܓܵܗ ܫܸܡܥܘܿܢ ܟܹܐܦܵܐ ܟܲܕ ܡܸܠܝܵܐ ܪܘܼܚܵܐ ܕܩܘܼܕܫܵܐ؛ ܐَܡܸܪܹܗ ܐܸܠܵܝܗܝ؛ ܓܘܼܪ̈ܵܢܹܐ ܕܛܵܝܸܦܵܐ ܘܚܘܵܪ̈ܕܸܩܢܹܐ ܕܒܹܝܬ ܝܼܣܪܵܝܹܠ. ܫܡܸܥܡܘܿܢ. 9ܐܸܢ ܐܲܚܢܲܢ ܐܸܕܝܘܿܡ ܦܝܵܫܵܐ ܝܘܵܚ ܕܝܼܢܹܐ ܡܸܢܵܘܟ̣ܘܿܢ ܥܲܠ ܫܘܼܠܵܐ ܛܵܒ̣ܵܐ ܕܗَܘܹܐ ܠܹܗ ܠܒܲܪܢܵܫܵܐ ܡܸܪܥܝܵܐ؛ ܕܒܡܘܼܕܝܼ ܐܵܗܵܐ ܦܝܵܫܵܐ ܝܠܹܗ ܒܘܼܣܡܵܐ. 10ܐܵܗܵܐ ܦܵܝܫܵܐ ܝܕܥܝܼܬܵܐ ܠܟܠܵܘܟ̣ܘܿܢ ܘܠܟܠܹܗ ܛܵܝܸܦܵܐ ܕܝܼܣܪܵܝܹܠ؛ ܕܒܫܸܡܹܗ ܕܝܼܫܘܿܥ ܡܫܝܼܚܵܐ ܢܵܨܪܵܝܵܐ؛ ܗ̇ܘ ܕܐܲܚܬܘܿܢ ܙܩܸܦܠܵܘܟ̣ܘܿܢ؛ ܗ̇ܘ ܕܡܘܼܩܸܡܠܹܗ ܐܲܠܵܗܵܐ ܡ̣ܢ ܒܹܝܬܼ ܡܝܼܬܹ̈ܐ؛ ܗܲܪ ܒܗ̇ܘ ܒܸܟܠܵܝܵܐ ܝܠܹܗ ܐܵܗܵܐ ܩܵܕَܡܵܘܟ̣ܘܿܢ ܨܵܚ. 11ܐܵܗܵܐ ܝܼܠܹܗ ܟܹܐܦܵܐ ܕܡܘܼܣܠܹܐܠܵܘܟ̣ܘܿܢ ܐܲܚܬܘܿܢ ܒܲܢܹ̈ܐ؛ ܘܐܵܗܵܐ ܗَܘܹܐ ܠܹܗ ܠܪܹܫܵܐ ܕܩܸܪܢܝܼܬܵܐ. 12ܘܠܲܝܬ ܒܐَܢܵܫܵܐ ܐَܚܹܪَܢܵܐ ܦܘܼܪܩܵܢܵܐ؛ ܣܵܒܵܒ ܠܲܝܬ ܫܸܡܵܐ ܐَܚܹܪَܢܵܐ ܬܚܘܿܬ ܫܡܲܝܵܐ ܕܦܸܫܠܹܗ ܝܘܼܗَܒ̣ܵܐ ܠܒܢܲܝ̈ܢܵܫܵܐ؛ ܕܒܝܹܗ ܘܵܓ̰ܸܒ ܝܼܠܵܗ̇ ܠܸܚܵܝܵܐ. 13ܘܟܲܕ ܫܡܸܥܠܗَܘܿܢ ܗܹܡܸܙܡܲܢ ܕܫܸܡܥܘܿܢ ܘܕܝܘܿܚܲܢܲܢ؛ ܒܓܸܠܝܘܼܬܼܵܐ ܐَܡܸܪܗَܘܿܢ؛ ܘܦܘܼܪܡܹܠܘܿܢ ܕܠܹܐ ܗَܘܵܘ ܐَܢܵܫܹ̈ܐ ܝܠܝܼܦܹ̈ܐ ܘܦܫܝܼܛܹ̈ܐ ܗَܘܵܘ؛ ܥܘܼܓ̰ܸܒܠܘܿܢ ܒܝܼܵܝܗܝ؛ ܘܝܕܸܥܝܵܝܠܘܿܢ ܕܥܲܡ ܝܼܫܘܿܥ ܟܹܐ ܗܵܘܝܼ ܗَܘܵܘ. 14ܘܟܲܕ ܚܵܙܝܼ ܗَܘܵܘ ܕܟܸܠܝܵܐ ܥܲܡܵܝܗܝ ܗ̇ܘ ܐَܢܵܫܵܐ ܕܦܸܫܠܹܗ ܒܘܼܣܡܵܐ؛ ܘܠܹܐ ܡܵܨܝܼ ܗَܘܵܘ ܠܹܐܡܵܪܵܐ ܡܸܢܕܝܼ ܠܕܲܪܩܘܼܒ̣ܠܵܝܗܝ. 15ܗ̇ܝܓܵܗ ܦܘܼܩܸܕܠܗَܘܿܢ ܕܦܵܠܛܝܼ ܗَܘܵܘ ܠܗَܘܿܢ ܡ̣ܢ ܟܸܢܫܵܝܗܝ؛ ܘܗܲܡܙܝܼܡܝܼ ܗَܘܵܘ ܚܲܕَ ܥܲܡ ܕܗ̇ܘ ܐَܚܹܪَܢܵܐ. 16ܡܘܼܕܝܼ ܥܵܒ̣ܕܲܚ ܠܐܲܢܹܐ ܐَܢܵܫܹ̈ܐ؛ ܣܵܒܵܒ ܕܢܝܼܫܲܢܩܵܐ ܐܲܫܟܵܪܵܐ ܗَܘܹܐ ܠܹܗ ܒܐܝܼܕܵܬܵܝ̈ܗܝ؛ ܠܟܠܵܝܗܝ ܥܵܡܪ̈ܵܢܹܐ ܕܐܘܿܪܸܫܠܸܡ ܦܸܫܠܹܗ ܝܕܸܥܝܵܐ؛ ܘܠܹܐ ܡܵܨܲܚ ܕܣܵܪܒ̣ܲܚ. 17ܐܸܠܵܐ ܕܠܵܐ ܙܵܘܕܵܐ ܦܵܠܸܛ ܒܘܼܬܿ ܐܵܗܵܐ ܡܸܢܕܝܼ ܓܵܘ ܛܵܝܸܦܵܐ؛ ܐܵܟ̣ܠܵܚ ܓܸܙܡܹ̈ܐ ܐܸܠܵܝܗܝ؛ ܕܡܸܢَܕܪܸܫَ ܠܵܐ ܗܲܡܙܸܡܝܼ ܒܐܵܗܵܐ ܫܸܡܵܐ ܠܐܘܼܦ ܚܲܕَ ܐَܢܵܫܵܐ. 18ܘܩܸܪܝܵܝܠܘܿܢ؛ ܘܦܘܼܩܸܕܠܘܿܢ ܐܸܠܵܝܗܝ؛ ܕܗܲܪ ܠܵܐ ܗܲܡܙܸܡܝܼ ܘܠܵܐ ܡܵܠܦܝܼ ܒܫܸܡܹܗ ܕܝܼܫܘܿܥ. 19ܐܝܼܢܵܐ ܓ̰ܘܼܘܸܒܠܘܿܢ ܫܸܡܥܘܿܢ ܟܹܐܦܵܐ ܘܝܘܿܚܲܢܵܢ ܘܐَܡܸܪܘܿܢ ܐܸܠܵܝܗܝ؛ ܐܸܢ ܗܲܩ ܝܼܠܵܗ̇ ܩܵܕَܡ ܐܲܠܵܗܵܐ ܕܐܸܠܵܘܟ̣ܘܿܢ ܫܲܡܥܵܚ ܙܵܘܕܵܐ ܡ̣ܢ ܕܠܲܐܠܵܗܵܐ؛ ܕܘܼܢܘܿܢ. 20ܣܵܒܵܒ ܠܹܐ ܡܵܨܲܚ ܡܸܢܕܝܼ ܕܚܙܹܠܲܢ ܘܫܡܸܥܠܲܢ ܕܠܵܐ ܗܲܡܙܸܡܲܚ ܠܹܗ. 21ܘܐَܟܸܠܘܿܢ ܓܸܙܡܹ̈ܐ ܐܸܠܵܝܗܝ؛ ܘܫܸܪܝܵܝܠܘܿܢ؛ ܣܵܒܵܒ ܠܵܐ ܡܘܼܫَܟ̰ܸܚܠܗَܘܿܢ ܐܸܠܵܝܗܝ ܗܲܓ̰ܲܬ ܕܵܐܟ̣ܝܼ ܕܬܲܥܠܡܝܼ ܗَܘܵܘ ܠܗَܘܿܢ؛ ܣܵܒܵܒ ܕܛܵܝܸܦܵܐ؛ ܣܵܒܵܒ ܟܠ ܐَܢܵܫܵܐ ܫܵܒܸܚ ܗَܘܵܐ ܠܐܲܠܵܗܵܐ ܒܘܼܬ ܡܸܢܕܝܼ ܕܗَܘܹܐ ܠܹܗ. 22ܣܵܒܵܒ ܙܵܘܕܵܐ ܡ̣ܢ ܒܲܪ ܐܲܪܒܥܝܼ ܫܸܢܹ̈ܐ ܗَܘܵܐ ܗ̇ܘ ܓܲܒܼܪܵܐ ܕܗَܘܹܐ ܠܹܗ ܒܝܹܗ ܐܵܗܵܐ ܢܝܼܫܲܢܩܵܐ ܕܒܵܣܲܡܬܵܐ. 23ܘܟܲܕ ܦܸܫܠܗَܘܿܢ ܫܸܪܝܹܐ؛ ܐَܬܹܐܠܗَܘܿܢ ܠܟܸܣ ܐܲܚܘܿܢ̈ܘܵܬܵܝܗܝ؛ ܘܗܘܼܩܹܐܠܗَܘܿܢ ܐܸܠܵܝܗܝ ܟܠ ܡܸܢܕܝܼ ܕܐَܡܸܪܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ. 24ܘܐܵܢܝܼ؛ ܟܲܕ ܫܡܸܥܠܗَܘܿܢ؛ ܒܚܕܵܐ ܓܵܢܵܐ ܡܘܼܪܸܡܠܗَܘܿܢ ܩܵܠܵܝܗܝ ܠܟܸܣ ܐܲܠܵܗܵܐ؛ ܘܐَܡܸܪܘܿܢ؛ ܝܵܐ ܡܵܪܝܵܐ؛ ܐܲܢَܬ ܝܼܘܸܬ ܐܲܠܵܗܵܐ ܕܥܒܸܕܠܘܼܟܼ ܫܡܲܝܵܐ ܘܐܲܪܥܵܐ؛ ܘܝܵܡܵܬܹ̈ܐ؛ ܘܟܠ ܕܐܝܼܬ ܓܵܘܵܝܗܝ. 25ܘܐܲܢَܬ ܝܼܘܸܬ ܕܗܘܼܡܙܸܡܠܘܼܟܼ ܒܝܲܕ ܦܘܿܡܵܐ ܕܪܘܼܚܵܐ ܕܩܘܼܕܫܵܐ؛ ܒܕܵܘܝܼܕ ܪܹܓܘܼܟܼ؛ ܩܵܡܘܿܕܝܼ ܫܓܸܫܠܗَܘܿܢ ܛܵܝܸܦܹ̈ܐ؛ ܘܡܸܠܲܬܹ̈ܐ ܚܫܝܼܒܼܠܗَܘܿܢ ܣܪܝܼܩܘܼܬܵܐ؛ 26ܩܸܡܠܗَܘܿܢ ܡܲܠܟܹ̈ܐ ܕܐܲܪܥܵܐ؛ ܘܗܵܟܝܼܡܹ̈ܐ ܓ̰ܡܝܼܥܠܗَܘܿܢ ܡܸܚܕܵܕܹ̈ܐ؛ ܥܲܠ ܡܵܪܝܵܐ ܘܥܲܠ ܡܫܝܼܚܹܗ. 27ܣܵܒܵܒ ܒܫܲܪܝܼܪܘܼܬܵܐ ܓ̰ܡܝܼܥܠܗَܘܿܢ ܓܵܘ ܕܐܵܗܵܐ ܡܕܝܼܢَܬܵܐ ܥܲܠ ܪܹܓܘܼܟܼ ܩܲܕܝܼܫܵܐ ܝܼܫܘܿܥ؛ ܗ̇ܘ ܕܐܲܢَܬ ܡܫܸܚܠܘܼܟܼ؛ ܗܹܪܘܿܕܸܣ ܘܦܵܢܛܝܼܘܿܣ ܦܝܼܠܵܛܘܿܣ؛ ܥܲܡ ܛܵܝܸܦܹ̈ܐ ܘܟܸܢܫܵܐ ܕܝܼܣܪܵܝܹܠ. 28ܠܸܥܒ̣ܵܕܵܐ ܟܠ ܡܸܢܕܝܼ ܕܐܝܼܕܘܼܟܼ ܘܨܸܒܼܝܵܢܘܼܟܼ ܩܵܕَܡܵܝܬܵܐ ܪܫܸܡܠܗَܘܿܢ ܕܗܵܘܹܐ. 29ܘܐܘܼܦ ܐܵܕܝܼܵܐ؛ ܝܵܐ ܡܵܪܝܵܐ؛ ܚܘܼܪ ܘܚܙܝܼ ܠܓܸܙܡܵܝ̈؛ ܘܗܲܒَܠ ܠܪܹ̈ܓܵܘܵܬܘܼܟ ܕܒܓܸܠܝܵܐ ܗܲܡܙܸܡܝܼ ܗܹܡܸܙܡܵܢܘܼܟ. 30ܟܲܕ ܦܵܫܘܿܛܹܐ ܝܘܸܬ ܐܝܼܕܘܼܟ ܠܒܵܣܲܡܝܵܬܹ̈ܐ؛ ܘܠܥܵܓ̰ܸܒܘܵܬܵܐ؛ ܘܠܢܝܼܫܲܢܩܹ̈ܐ؛ ܕܗܵܘܝܼ ܒܫܸܡܹܗ ܕܒܪܘܿܢܘܼܟܼ ܩܲܕܝܼܫܵܐ ܝܼܫܘܿܥ. 31ܘܟܲܕ ܛܠܸܒܠܗَܘܿܢ ܘܦܘܼܪܦܸܠܗَܘܿܢ؛ ܦܸܫܠܵܗ̇ ܫܥܝܼܫܬܵܐ ܗ̇ܝ ܕܘܼܟܬܵܐ ܕܓ̰ܸܡܥܝܹܐ ܗَܘܵܘ ܓܵܘܵܗ̇؛ ܘܦܸܫܠܗَܘܿܢ ܡܸܠܝܹܐ ܟܠܵܝܗܝ ܒܪܘܼܚܵܐ ܕܩܘܼܕܫܵܐ؛ ܘܗܲܡܙܸܡܝܼ ܗَܘܵܘ ܒܓܸܠܝܵܐ ܗܹܡܸܙܡܵܢ ܕܐܲܠܵܗܵܐ. 32ܘܐܝܼܬ ܗَܘܵܐ ܠܟܸܢܫܵܐ ܕܐَܢܵܫܹ̈ܐ ܕܐܵܢܝܼ ܕܗܘܼܡܸܢܹܐ ܗَܘܵܘ ܚܕܵܐ ܓܵܢܵܐ ܘܚܲܕَ ܪܸܥܝܵܢܵܐ؛ ܘܠܵܐ ܐَܢܵܫܵܐ ܡܸܢܵܝܗܝ ܐܵܡܸܪ ܗَܘܵܐ ܒܘܼܬ ܡܸܢܕܝܵܢܹ̈ܐ ܕܐܝܼܬ ܗَܘܵܐ ܠܹܗ؛ ܕܓܵܢܹܗ ܗَܘܵܘ؛ ܐܸܠܵܐ ܟܠ ܡܸܢܕܝܼ ܕܐܝܼܬ ܗَܘܵܐ ܠܗَܘܿܢ ܩܵܐ ܟܠܵܝܗܝ ܝܼܗَܘܵܘ. 33ܘܒܚܲܝܠܵܐ ܓܘܼܪܵܐ ܟܹܐ ܝܵܗَܒ̣ܝܼ ܗَܘܵܘ ܣܵܗܕܘܼܬܵܐ ܐܲܢܹܐ ܫܠܝܼܚܹ̈ܐ ܥܲܠ ܩܝܵܡܬܹܗ ܝܼܫܘܿܥ ܡܫܝܼܚܵܐ؛ ܘܫܵܦܵܩܲܬ ܓܘܼܪܬܵܐ ܐܝܼܬܼ ܗَܘܵܐ ܥܲܡ ܟܠܵܝܗܝ. 34ܘܠܲܝܬ ܗَܘܵܐ ܓܵܘܵܝ ܐَܢܵܫܵܐ ܣܢܝܼܩܵܐ؛ ܣܵܒܵܒ ܐܵܢܝܼ ܕܐܝܼܬ ܗَܘܵܘ ܠܗَܘܿܢ ܚܲܩܠܵܢܹ̈ܐ ܝܲܢ ܒܵܬܹ̈ܐ؛ ܙܵܒ̇ܢܝܼ ܗَܘܵܘ ܠܗَܘܿܢ ܘܡܲܝܬܝܼ ܗَܘܵܘ ܛܝܼܡܵܐ ܕܡܸܢܕܝܼ ܙܘܼܒ̇ܢܵܐ. 35ܘܡܲܬܒ̣ܝܼ ܗَܘܵܘ ܠܟܸܣ ܐܲܩܠܵܬܹ̈ܐ ܕܫܠܝܼܚܹ̈ܐ؛ ܘܦܵܝܸܫ ܗَܘܵܐ ܝܘܼܗَܒ̣ܵܐ ܠܟܠ ܐَܢܵܫܵܐ ܐܲܝܟܼ ܡܸܢܕܝܼ ܕܝܼܗَܘܵܐ ܣܢܝܼܩܵܐ. 36ܘܝܵܘܣܸܦ؛ ܗ̇ܘ ܕܦܸܫܠܹܗ ܩܸܪܝܵܐ ܒܲܪܢܒ̣ܵܐ ܡ̣ܢ ܫܠܝܼܚܹ̈ܐ؛ ܕܦܝܵܫܵܐ ܝܠܹܗ ܡܬܘܼܪܓ̰ܸܡܵܐ؛ ܒܪܘܼܢܵܐ ܕܝܵܗَܒܲܠܬܵܐ ܕܠܸܒܵܐ؛ ܠܹܘܵܝܵܐ؛ ܡ̣ܢ ܐܲܬܼܪܵܐ ܕܩܹܘܦܪܘܿܣ 37ܐܝܼܬ ܗَܘܵܐ ܠܹܗ ܚܲܩܠܵܐ؛ ܘܙܘܼܒܢܵܐܠܹܗ؛ ܘܡܘܼܝܬܹܐܠܹܗ ܛܝܼܡܘܼܗ̇ ܘܡܘܼܬܸܒ̣ܠܹܗ ܩܵܕَܡ ܐܲܩܠܵܬܹ̈ܐ ܕܫܠܝܼܚܹ̈ܐ.